देशका विभिन्न स्थानमा वर्षा,डोटीमा चट्याङ लागेर एक महिलाको ज्यान गयो

Tuesday, April 21st, 2020

 पर्सिबाट फेरि अर्को निम्न चापीय प्रणाली प्रवेश गर्दै

चक्र प्रसाद पोख्रेल

काठमाडौंः हाल काठमाडौं उपत्यकासहित देशका विभिन्न स्थानमा वर्षा भइरहेको छ । यसैगरी हिजु डोटीको पश्चिमी क्षेत्रमा पर्ने सायल गाउँपालिका ३, तोलेनीमा चट्याङ लागेर एक महिलाको ज्यान गएको छ । जिल्ला प्रहरी कार्यालय डोटीका प्रहरी निरीक्षक कर्णबहादुर बोहराका अनुसार चट्याङ लागेर ज्यान गुमाउनेमा २२ वर्षीया उजली बयाडी रहेकी छन् ।
आफ्नै खेतमा गहुँ काटिरहको अवस्थामा परेको चट्याङ लागेर उहाँको घटनास्थलमै ज्यान गएको स्थानीय प्रहरीले जनाएको छ ।डोटीमा सोमबार रातिदेखि पानीसँगै हावाहुरी चलिरहेको छ ।पछिल्लो ६ घण्टामा देशको धेरैजसो स्थानमा वर्षा भइरहेको छ । अन्य स्थानको तुलनामा प्रदेश नम्बर २, बागमती, गण्डकी, प्रदेश नम्बर ५ र कर्णाली प्रदेशमा बर्षा बढी भइरहेको मौसम विज्ञान विभागले जनाएको छ ।
मौसमविद मन्जु बासीले ती स्थानहरुमा मेघ गर्जन, चट्याङ, हावाहुरी र असिनासहित वर्षा भैरहेको र उक्त प्रणाली उत्तर पूर्वतिर सर्दै गएकाले सतर्कता अपनाउनु पर्ने बताइन् ।
पछिल्लो ६ घण्टामा देशको धेरैजसो स्थानमा वर्षा भइरहेको र थप वर्षा हुने सम्भाना पनि रहेकाले खासगरी कर्णाली, प्रदेश ५, गण्डकी, बागमती, प्रदेश २ र प्रदेश १ को पहाडी भागबाट बहने नदी तथा खोलामा जलसतह बढ्ने अनुमानसमेत गरिएको छ ।

पर्सिबाट फेरि अर्को निम्न चापीय प्रणाली प्रवेश गर्दै

मौसमविद मन्जु बासीका अनुसार अहिले प्रिमनसुन गतिविधि सक्रिय छ । त्यसमा पनि स्थानीय वायु र पश्चिमी निम्न चापीय प्रणाली मिसिएको छ । साथै बंगालको खाडीबाट निस्किएको जलवाष्पयुक्त हावा आइरहेकाले पनि नेपालमा पानी परिरहेको छ ।

मौसमविद मन्जु बासीका अनुसार काठमाडौं उपत्यकाको हकमा अहिले परिरहेको पानी दुई–तीन घण्टापछि रोकिन्छ । तर मौसमी प्रणालीलाई हेर्दा मंगलबार दिउँसो र बुधबारसम्मै पानी पर्ने देखिन्छ । यद्यपि मंगलबारको तुलनामा बुधबार केही कम पानी पर्ने मौसमविदको अनुमान छ ।

‘तुलनात्मक रुपमा आज जति सक्रिय छ, भोलि योभन्दा अलि कम हुने देखिन्छ,’ मौसमविद बासीले भनिन्, ‘पर्सिबाट फेरि अर्को निम्न चापीय प्रणाली प्रवेश गर्दैछ । त्यही भएकाले पर्सि पश्चिमी भूभाग अलि बढी प्रभावित हुन्छ ।’

सोमबार राति १२–१ बजे अगाडिसम्म कर्णाली र प्रदेश नम्बर ५ मा बढी पानी परेको थियो । मंगलबार बिहानदेखि भने गण्डकी, बागमती, प्रदेश २ मा बढी पानी परिरहेको छ । पानी पार्ने यो प्रणाली उत्तरपूर्वतिर सर्ने क्रममा छ । त्यसैले प्रदेश नम्बर १ सम्म पनि यसको प्रभाव देखिने मौसमविद बासी बताउँछिन् ।

Facebook comments

फोटो फिचर

Social

Pin It on Pinterest